Di undi bo e, ka nporta-m

N’un kusinha!

Ki sa ta nporta-m

E bu kontentesa pregadu

Na bus odju xeiu sima lua

Fundiadu na nha braku’l petu

Ta faze-m un kusa rabes…

O, flor! Djobe li…

Bu kontentesa nosenti

Na dimeu musturadu

Boka stangu ta frakise-m...

Trokadu kel li, N kre pa bu pista-m

Un padas d’el, pa N konsola dimeu…

Pista-m si kre so un padas

Pa N ri ku el na boka’l tardi…

Ma, N kre kel padas ratxadu

Ki ora ki nhas odju ri ku el

Agu’l ta pari-m na boku

I, dentu’l mi, ta abri uatxi…