Tenpu!
Bu bai, bu rabida
I bu trazi kontradison
Rodidjadu na dimagojia
E na kontra-tenpu di tenpu
Ki bu ta atxa kes dimagogu
Baxu di sol raganhadu
Ku kalsa ramangadu
Kamisa sen boton
Kabesa bafadu ku txapeu txapa-txapa
Ta subi ladera i ta dixi kobon
Purki kanpanha dja konku porta
Leison ta kanba na fiu di kutelu
Na pregu di sidadi, skritoriu ta finkadu
Baxu d’ar kondisionadu
I odensia e ku obidensia
Na rua!
Povu ta kumi konbersu fiadu
Ku konsensia maradu
Na po di spera…
Forti kontradison
Nes padas di nason!
