Vanny ku Andreia, ja N tinha gana di oja- nhos, komu dupla, li na spasu kultural di es grandi jornal on line SANTIAGO MAGAZINE. Kel puema li, FLOR DI FAROL, é mesmu bunitu, lindu. Enbora skritu pa dos mujer, dos poetiza linda i inteligenti, sujetu puétiku des puema é un omi, konsientimenti paxonadu, ki ta ezalta i sobrivaloriza si grandi amor di si vida i e ka ten vergonha di konpartilha si sentimetu ku públiku letor. Obijetu puétiku di es puema li é un mujer, un mujer ben amadu, más un mujer ki tanbe ta ama txeu, ki ta dá sujetu puétiku, len di amor, seguransa, konfortu y respetu, pabia, indipendentimenti di paridadi, AMOR É, NA FUNDU, RESPETU PA KUNPANHERU, na un kímika di atrason di OMI KU MUJER pa un sinfonia perfetu, o kuazi perfetu, ku universu. Vanny ku Andreia, ja N flaba- nhos, un bes, ma mi é dodu na nhos, mas kada dia N sata fika más dodu na nhos oras ki N lê nhos puema. Sinseramenti, nhos é dos puetiza kriola, inda pursima, BADIAS DI NOS ILHA DI SANTIAGU, ku un nível di puezia, na stilu modernísimu, mutu pa riba di média, dos puetiza ki, ker individual ker ku parseria, ten konkistadu, sen favor, ku si méritu própi, UN LUGAR SIGURU NA SINÁKULU DI POESIA NA KABU VERDI. Forsa, txeu forsa, nhas puetiza di korason, ki MUZA, DEUZA DI PUEZIA, NUNKA MÁS LARGA NHOS PÉ! Un grandi abrasu badiu i kauberdianu, un abrasu más grandi ki nos monti PIKU NTONI!