Na azul divinu di mar lonji

Kurason en migalia

N seka Lagua na batenti'l porta

Sidadi vizivel na nha mo

Odju na kurason sen porton

Lagua baradja-m

Beju sen bespa

Alma due-m

N sana-u ku butuperiu na petu

Nha sandalia na pe e nha txabi

Moda kor di arvori

Finason i kunfiansa na dedu bensedu

Ta konkista pasus di futuru

Ku inpenhu na soma mi ku bo

Lenha na lumi ta kusia tenpu

Na melodia di nha txoru

N multiplika sodadi na Matimatika di bu labius

Bu surizu karenti na bentu

Bu rekadu mondodu

Moda tribiseru baxu nha grodi

Fazi disliza kamisa di nha koxa

N xinti friesa na kosta

N lenbra

Sol kudi-m amoroza

Saia na bentu di ligria

Korpu na lus di sol

Agu na lagoa

N murgudja na lenbransa

Surizu kai-m

Era li ki nos odju kruza

Ki majia enkantanu

Ki karisia toma konta di nos

Bu nomi grava na mi

Undi nansi un kumesu sen fin.