Nha vontadi ka puder
N ta dizejaba tinha puder
Di duspi bu korpu so ku odju
Di perdi na kada sorizu di bu boka
Pa N xinta na bu kurba diskansadu
Pa N intola na soris di bu korpu
Ah, puder
Era pa N tinha
Puder di rabida sol pa dipalbesa
Pa N panha dia pa N fazi noti
Pa N xinta ku bo na npena nha bida
Pa N konta-u stória nha minineza
Ah, puder...
Dja N krê tinha puder
Di ladridja bu korpu
So ku forsa di nha pensamentu
Pa N intxi-l di prazer di sedu pa tardi
Puder di fazi txuba txobi so ku bu soris
Puder di ser oji ku onti sen medu
Puder di subi ladera sustedu na fiu di bu kabelu
Ah, minina...
Dja N krê tinha puder
N ta dizejaba puder
Puder di papia ku bo sen palavras
Di kanta múzika sen ten letras
Di ser kel txeru sabi na bu naris
Puder di ser kel livru sen pajina
Ki ta sta skritu mil stória di nos dos....
Dja N krê tinha puder
Puder di volta na tenpu
I traze-u pa nha prizenti
Puder di ba lua pe na txon
Pa N traze-u i leba-u pa nha futuru
Mas, nha vontadi ka puder
02 DI JANERU 19
ORA: 15:40 DI TARDI
