Ô Cabu Verdi terra querida;

Terra undi tem páz i maravilha;

Ku si amor i morabeza na tudu ilha;

Undi si povu amadu ta distranca sês bida.

Di norti a sul badiu ku sampadjudu ta labuta ku cumpanheru;

Kada um ta djuguta pa si sustentu;

Oras ki kau birás fastentu;

Unícu sperança ê di bai pa strangeru.

Homi ku mudjer tudu di rostu soridenti;

Ta anda ta da pasu sempri pa frenti;

Ê sês sperança na dia midjor;

Ki ta fazês sempri squeçi sês dor.

Cabo Verde terra di nativu i strangeru;

Cada um ki bem pa li ta spadja si alegria;

Ninhum ka ta kré larga cumpanheru;

I kes ki bai tudu ta kêxa nostalgia.

Apesar di pobri, li ki sta nôs bida;

Tudu kês ki um dia dificuldadi pôs largau;

Sodadi ta pôs volta pa ês bem abrasau;

Pamodi bó ki ê nôs terra querida.