Tudu santu dia

Bu ta komesa katikatida

Na kantiga di primeru galu

Ku bu odju ndogadu di sonu

Bu ta kanba npena

Pa berifika kafe pretu

Ta ferbi na tres pe

Pa bu kretxeu kebra djudju

Antis mata un dia di jornal

Tudu santu dia

Bo e finkadu na terreru

Ku mininu bonbudu

Ta rasmunga kantiga

Na son di po di pilon

Tudu santu dia

Bu ta pintxa noti

Ku pe lapu na txon

Madri pertadu na kosta

Ora ta fetifeti na rubera

Ora na buska fexu lenha

Mudjer di sol-a-sol

Konxedu pa partera

Famadu pa tudu ladera

Na pedra di merkadu

Bendedera di alegria

Ma na sulera di si porta

El e dona di si distino

Ah, mudjer di sol-a-sol!

Si dia-dia e pega txoti i larga grilu

Mudjer rixu sima pedra

Ma di kurason moli sima agu.

Ah, mudjer di sol-a-sol!