Sôdadi é um grande vontadi
vontadi abraça algo e alguém
di perta e ka larga pa eternidadi
é bô sôdadi doença tudu alguém
Sôdadi ka é um simples sentimentu
é um grandi deseju di teni
é “falta di” ki ta causa sufrimentu
ta poi coraçon ta tremi e gemi
Sôdadi é um stúpido sentimentu
é alimenta prisenti ku lembranças di passadu
é ka aceita perda e rompimentu
é insisti pa retornu
Sôdadi ki nem sempri é matadu
ta dexa dor e marca di cicatriz
más basta é kuradu
alegria na nós ta kria raiz
Sôdadi podi desejadu
si em brevi é ta matadu
más, és sentimentu nostálgica
és sensason melancólica
pa mutu tempu é ka ta aguentadu
Sôdadi é odja kel ki ka sta nós frenti
é incanta ku iluson
e hoxi sufri pa um nada
ki onti, pa nós era tudu
Sôdadi é krê revivi
mesmu sabendu ma ka é possível
é ka dexa lembranças removi
é um perda inadmissível
é Sôdadi mamá, papa, irmom
sôdadi famílias, kretxeu e terra
Sôdadi di td ki um dia pa nós foi bom
Sôdadi é deseju oportunidadi agarra
é um ponti cortado na meio
ki pé kurtu ka ta ultrapassa
si salta podi cai beio
na busca di um toki pa corpo compassa
e pa sodadi dispassa
Sôdadi ka é sô dalguém
é ka sô sta sem toka ninguém
Sôdadi també di tudu
ki foi importanti pa nós mundu
ki um dia perdi e nú koya más
é ka ten prefiridus
é atingi pobris e ricus
só é ka fasi si morada
ken ki nunca perdi,
nunca da valor,
ki ka sabi kusé é amor
Sôdadi anda tudu cidadi
é alcansa spertu
é alcansa nocenti
el é um ânsia di trazi pa pertu
é só é ka consigui pô fica doenti
Um grandi obssesson pa passado
Ki ta poi prisenti doenti
Um presenti cheio antipassadu
ké distinu dotu guenti
Sôdadi é barulho di algo ausenti
gana vivi passadu na presenti
txubas di lagrimas di recordaçon
pa alivia pobri coraçon
Sôdadi é um noti di insónia
é anda e ka txiga
é xinti ma o ki bai bali pena
um grandi vontadi bai djuntu
sabendu mó ten ki fika
Sôdadi é nós fracassu
más nu tem ki chintil
el é motivu txeu regressu
sem el, lembranças é inútil
Ai Sôdadi, sim chintiu
mostram arma pam matau
só assi pam chinti friu
sé pô dominam nka desejau
Ai Sôdadi,
beleza nós tristéza
riqueza nós solidon
tristéza nós corason
Ai Sôdadi,
bô é sâbi,
si logo bu ta matadu
txeu kasâbi,
si jamais bu ka ta kuradu
Ai Sôdadi,
é bô propi ké “nten ki bai”
e “nsta ku vontadi fica e kabai”
bu chinti sôdadi?
ntom um dia, bu ka foi bô só
algo era bu metadi
e distinu lebal sem bô.
